لو 

آه لو أعرف أداوي قلب 
آه لو أعرف أداوي جرح 
آه لو أعرف أطفي نار 
آه لو أعرف أمحي حزن
آه لو أعرف ألغي الدمع
آه لو أعرف أرسم ضحكة 
آه لو أعرف أطبطب علي قلب
آه لو أعرف أواجه حزن 
آه لو أعرف أصاحب نفسي
آه لو أعرف ألغي الوحدة 
آه لو أعرف أحقق حلم 
آه لو أعرف أغيّر فِكر
آه لو أعرف أكتب كلمة تمس القلب 
وآه لو أعرف أطير 

 شعاراااااااااااااااااات 

حياتنا كلها شعارات 
النظافة من الايمان , من تواضع لله رفعه , حب لاخيك ما تحب لنفسك , الشكل مش كل حاجة , الاخلاق اولا واخيرا , المال بيروح ويجي ومش مهم , الكدب حرام , الحياة قصيرة المهم الآخرة , القراءة غذاء الروح " ونحن أمة جاهلة " وهكذااااا ............
نعم فيه احاديث عن الرسول صلي الله عليه وسلم ولكنها ايضا شعارات 
والشعار هو الشئ اللي بنتكلم ونُنادي به علي انه الصح وهو الصح فعلا ولكن لا نعمله 
ان نُطالب الاخرين به ونتربي عليه ولكن لا نطبقه 
ان نخجل بمن لا يعترف به ولا يكون من اهم واحب المأثورات لقلبه
طيب المهم فين الفعل ؟! فين التطبيق علي الكلام ؟! كله في الهوا 
يتربي الطفل في البيت والمدرسة علي ان الكدب حرام وعيب وضعف ولكن الاب والام بيكدبوا بسهوله , يرد الابن علي التليفون مثلا وهناك من يريد الاب فيجيب الاب قوله انا مش هنا !!!!!!!!!!! المدرس في المدرسة النظافة من الايمان وتلاقيه ريحته بشعة ومظهره لا يُطاق ويرمي الزبالة علي الارض
يا ناس يا بشر انا اتعلم مما أراه بعيني فقط لا غير 
انا مش انسان ألي يتلقي تعليمات وتوجيهات يمشي عليها 
ولكن انا لي عقل واميز الصح من الغلط , والخير من الشر .. ومش معني اني غلطت اني احمل غيري نتيجة غلطي واتهمه انه السبب , ابدا 
ولكن لكل فعل رد فعل , لكل نتيجة سبب واسباب وافعال 

كل الحكاية لا تقول إلا ما تؤمن به وما تفعله فعلا وما تراه مناسب 
لا تشبه أحد ولا تحاول تغير أحد ليشبهك , كن نفسك كما تريد وكما تراها وكما تحبها 
" ان كنت بتحبها اساسا "
المهم انك تكون مقتنع بكلامك وافعالك 
فكما يقال ... فعل رجل في ألف رجل خير من قول ألف رجل لرجل 

فيلم crash 

مش عارفة ليه الفيلم ده بيأثر فيا وبيوجعني , يمكن عشان واقعي 
مفيش حد ابدا كله اخطاء وفاشل وشرير بالكامل ولا فيه حد مثالي وصح وكله خير بالكامل 
كلنا فينا خليط من الخير والشر , كلنا فينا جزء ملائكة وجزء شياطين 
طيب ليه بيفرق معانا الناس ؟! عشان فيه ناس وسط 20 شر قبل أو20 شر بعد بيكون عمل خير واحيانا بيكون لسبب 
مشكلة الشر لما بيكون متعمد او بسبق اصرار مش شر عرضي او غير مقصود النوعية دي مهما عملت من خير بيكون شرها دايما قدام عنينا كانه مرسوم علي وشها 
مهما ابتسمت الوشوش او اتمدت لينا الايادي المستعدة لمساعدتنا بنفتكر الشر الكامن القاصد اذيتنا !!!
النوع التاني وهم اللي خيرهم بيكون قبله أوبعد شر بيكون شرهم غير مقصود ولا متعمد وتلاقي الخير اللي عملوه محفور في اذهاننا دايما عشان يلطف قلوبنا ناحيتهم 
الخلاصة علي حسب غلاوة ومحبة ومقدار الشخص اللي أساء اليك بيكون الزعل والخصام ... فيه ناس بعد صباح الخير منهم او حتي ابتسامة بتكون نسيت اي زعل , وناس تحاول تصلحك ايام ويفضل في القلب حاجة منهم دايما 
عجيب هذا القلب .....

واحمل عبء قلبك وحدك 

في جملة واحدة اختزل درويش كلام كتير ووصف لحالتنا عندما يجتاح القلب اي عبء 
قد تجد من يحمل عنك عبء التزامات الحياة او عبء الوحدة او عبء الحزن او اي عبء 
حتي لو ساعدونا ظاهريا يكفي ان العبء ظاهر امام الجميع والبعض يظهر لك ويمد لك طلب المساعدة " حتي لو كان كلام فقط  " 
ولكن عبء القلب لا يراه ولا يشعر به ولا يلمسه غيرنا !!!!! نحن فقط 
نشعر بالم العبء وثقله حتي يصل القلب الي حد الاختناق من كثره الثقل الذي يزداد علي القلب 
المشكلة انه ثقل معنوي غير قابل للوصف بكلمات ولا رسومات , هي حالة تجتاح القلب احيانا بدون سبب " في الوقت الحاضر لعله في الماضي " او لسبب لا نريد ان نواجه انفسنا به 
ازاي القلب يوصف حالة من التغير علي حاله انا اراها تماما كالشط عندما تهجم عليه موجة فتظنها عابرة وهي اجتياح من موجة لموجة لموجة حتي يختفي الشاطئ من وراء كثرة الامواج , وتذهب بعدها الامواج وتترك الشاطئ بدون عبء

الرجل 

الحب هو الكلمة الاقل حروفا والاكبر استخداما للكلمات والجمل لتفسيرها ولا يوجد معني محدد لها ولا نكتفي من اضافة الجديد لتفسير معناه  

والرجال في الحب نوعين لا ثالث لهما " عن الرجال اتكلم وليس اشباه الرجال ولا المعوقين ذهنيا ويدعون الرجولة " 

من ناحية الكلام
الصنف الاول كالماء العذب يجعلكِ كالوردة تفوح عطرا وجمالا ونضارة .... الثاني كالماء المالح يجعلكِ تذبلين وتنكمشين ويضيع نضارتك في عز الربيع كانك في الخريف

من ناحية الاخلاق 
الاول قليل , نادر , قابل للانقراض .... الثاني كثير ويزداد وينقل العدوي 

من ناحية حبه لكِ
الاول يجعلكِ تري الناس بعيون جميلة مبتسمة مقبلة علي مباهج الحياة في حالة ربيع دائم لا تري الا الجمال فقط .... الثاني يجعلكِ تري الناس بنضارة سوداء بكآبة وحزن 

من ناحية كلامه وحواره ونقاشه 
الاول يجعلكِ تـذوبـيـن ... الثاني يجعلكِ تذبلين 

من ناحية دينه 
الاول وسطي في كل شئ لا يعتبر ان دين بالمظاهر وترك الباطن , يرعي الله فيكِ كما يراعي امه واخته , يعلم انه يوجد فرق بين الكبائر وبين الهفوات لاننا بشر , يعلم ان الحلال والحرام معلومين وواضحين لمن اراد ! ... الثاني يهتم بالمظاهر يهمه ان تستري جسدك ولا تستري لسانك , ان تكون اخلاقك وعلمك بالقران يساوي صفر ولكن ما يقوله الناس عن مظهرك اهم ! لا فرق بين الهدية والرشوة لديه . المسميات لها تبرير دائما عنده لما يتوافق مع ما يريد هو وليس ما قاله الدين 

الخلاصة اذا اخترتِ الرجل المناسب فانتِ في الحب المناسب ! الرجل الذي يحتوي عقله علي بعض الجنون لتستمر الحياة بلا ملل , ويحتوي قلبه علي حب بشغف ! 

إزاى تكون مكتئب

كل الناس تنصحنا بالتفاؤل والابتسام للحياة وازاي حياتنا حتكون أجمل وأحسن .. طيب سؤال إيه في الحياة ممكن يخلينا متفائلين ؟! الدراسة ولا أصحاب المصالح ولا الشغل ولا ايه تحديدا ! ويقولوا اقرأ عشان دماغك تكون افضل واحسن يعني اكبر عقلي وانا اللي معايا عقلهم اصغر وبيصغر كل ما اكبر انا ! ايه الفايدة من القراءة ! كل واحد ينصحك ويديك درس طويل عريض عن الأخلاق والتفاؤل وازاي لازم تضحك في وجه غيرك طيب انتم بتعملوا كده ! ولا عايزين الناس تعمل اللي انتم عايزينه وانتم محدش يطالبكم بحاجة !

حتي مفيش اختيار كامل في حياتنا ! ايه في الحياة فيه اختيار ؟! لا ب أختار أهلي ولا عائلتي ولا المكان اللي اتولدت فيه ولا المستوي ولا شكلي ولا نسبة ذكائي ولا مهاراتي ولا ولا ولا حاجات كتير .... الأسوأ ان حتي اختياراتنا بعد كده بتكون مُرة وغبية وأحيانا مفيش اختيارات اصلا ! مثلا مسلسل العشق الممنوع " بشير " معندوش اختيارات هو اتولد فقير ومريض وقلبه مش ملكه وحب بنت الملك وهو لا حاجة بس " سمر ومهند " عندهم اختيارات كتيرة وكمان الحياة معاهم في كل وقت ! فين العدل وفين الاختيار ؟! الاختيار مش انك تخيرني بين حاجتين شبه بعض او قريبين من بعض , الاختيار بين حاجات مختلفة من الشرق للغرب , من الجنون للعقل .

مش معني كلامي كفر او ان ربنا مش عادل ابدا انا اقصد ان الحظ ساعات واوقات كتيرة بيكون له دوره او كلمة تشجيع من شخص او حتي ابتسامة تخليك تغير كل حياتك . حياة البنت " تحديدا " مفيش فيها اختيارات متعددة !

حلم صديقتي 

 قالت لي صديقتي عن حلم رأته ... رأيت كأني مت وروحي خرجت مني ولكن لم اطلع للسماء ولم أري الملائكة ولكن أري الناس حولي ولا يروني لم يحزن عليّ إلا أختي فقط والباقي لا ,, كنت بدور علي أي حد أحاول اكلمه أو أحسسه بوجودي لكن من غير فايدة , الغريب إني كنت زعلانه إني لسه ما فرحتش ولا استمتع بالدنيا زى ما بحلم دايما ...

غريب الموت والأغرب رؤية اللي فاكر إنهم يحبوك وأنت بالنسبة لهم ولا حاجة . اللي بيكلموك لمصلحة او عشان بيفضفضوا معاك او لتضيع الوقت انما وقت الجد بيطيروا زي الدخان .

الموت اللي هو الموت يعني طلوع الروح مش مشكلة في حد ذاته إلا إذا كان عملك هباب وكده ولكن أنا اقصد الموت التاني هو اللي صعب انك تموت وأنت لسه حي بتتحرك وتأكل وتشرب وتتنفس ولكن ميت إيه الفايدة أحياء أموات ! في الحالة دي الموضوع أسوأ ف الألم هنا أشد وأقوي.... إنك تحس بعدم أهميتك وإن الحياة بتسرق منك أيامك وعمرك وكمان بتطلع ليك لسانها وتبدل كل حلمك عندك بألم ووجع وتحرمك من حتى الخيال والحلم ! الحياة مراحل أمل وبعدين ألم وأوقات بيكون ألم وبس . ياريت الموت كان من ضمن اختيارات الحياة !
وتفتكر كلام درويش " تُنسي كأنك لم تكن "
ولكن درويش يقول تُنسي ككنيسة مهجورة لن تُنسي الكنيسة ستظل موجودة بداخل كل من صلي فيها ودخلها 
ويقول تُنسي كحب عابر لكن سيترك هذا الحب لحظة كذكري تعبر خيال المحبين

لا س أُنسي كأن لم أكن شيئاً أبداً ...