فرصة تانية 

حياتنا بعد الموت فيها اختلافات كتيرة , رأي بيقول ان ارواحنا تنتهي مع نهاية أجسادنا
ورأي بيقول ان ارواحنا تفضل تهيم في الكون 
ورأي ان في حياة تانية بعد الموت للجسد والروح
ورأي بيقول ان ارواحنا تكون نجمة في السماء عشان تنور حياة ناس تانية وترشدهم
ورأي بيقول ان ارواحنا تكمل في أجساد تانية بس الروح بتنسي

في الحياة نفسها واحنا بنعيش فيها جسد وروح , هل أجسادنا متصلة دايما بأرواحنا ؟!
معظم الناس عايشة وخلاص  بتغذي الجسد فقط , الحياة بتحركهم زي عرائس الظل
مفيش معني للحياة معني ان " تحيا " تشعر بالحياة
ليس كل من يتنفس حي الكثير أموات يتنفسون 
وهنا يجي دور الحياة او القدر بمعجزة او " فرصة تانية " يفتح لنا باب أو بصيص من النور
عشان نغير حياتنا ونحيا 

 واللي بياخد الفرصة التانية في الحياة نوعين 
نوع له حظ اختارتهم الحياة اختيار عشوائي , ونوع مد ايده واخد الحظ من الحياة باصراره وعناده ولهفته للتغيير
ممكن تكون الفرصة التانية في قصة حب أو في تغير مجال الشغل أو بعمل شئ مفيد 
او الأهم من كله ده إنك تلاقي نفسك , انك تكتشف ليه انت موجود في الحياة 

المشكلة اننا مرتبطين بجدول زمني وهو أعمارنا عشان كده ساعات كتيرة بيعدي العمر وخلاص 
وعشان اللي فات مكنش زي ما حلمنا مش بنفكر في اللي جاي ممكن يكون ازاي

بس ممكن ممكن واحتمال تتغير الحياة ولو ليوم او ساعة زي ما حلمنا قبل ما العمر ينتهي ونكون نجمة في السماء
وقتها ح نكون نجمة سعيدة ومنورة اكتر لان اخر وقتنا كنا اكتر سعادة ...