الجمعة، 25 يناير 2013

الحرية 

الحرية مش طلب ممكن تطلبه ويعطيه لك طرف تاني ! الحرية لها اسس ونظام , تربية من الطفولة من حرية في التعبير عن رأيك ومسئوليتك تجاه اختيارتك , الحرية في المدرسة أمام مدرسك ومناقشته وعرض أفكار جديدة وحديثة ويتقبل هو النقاش معاك والاهم يتقبل انك ممكن تكون صح , الحرية في اختيار الكلية اللى ح أكمل فيها مش اللى تناسب مجموعي وبس ولا كلية من كليات القمة لأ الكلية اللى تتناسب مع قدراتي ومواهبي اللى البيت والمدرسة ساعدوني علي اكتشافهم , الحرية في الشغل نعم احترام الرؤساء ولكن ايضا احترم الاقل مني اتقبل منهم النصيحة والنقاش , ويكون الشغل علي حسب الكفاءة مش الوسطي عشان أحس كفرد بقيمة شغلي وأشتغل لأني أستحقه ,
الحرية في اختيار الشريك المناسب للحياة مش يكون متدين وابن ناس وعنده وعنده وعنده ,الاهم ان الشريك يكون فعلا شريك بيكمل شريكه ومش بيتطابق معاه , شريك يغير فيه ويتغير معاه ... الحرية في القرارات والحياة بتكون ممارسة مع ظروف سياسة تسمح بحرية رأيك تقوله بأدب إنما مع قلة الأدب فأنت لا تعرف الحرية أبدا , الحرية مش كلام ولا ينفع بعد قمع سنوات وسنوات بل قرون في مصر تحديدا انك تنشأ حرية بين يوم وليلة تحتاج لسنوات لتربية جيل جديد يتناقش ويفهم ثم يتكلم . جيل يتعلم القراءة , يتعلم أصوله العريقة , يكون هدفه البلد عنده هدف عام وليس مصالح شخصية .
الحرية مش بحرق بلدك ولا بشتم وسب الغير ,, كل واحد بيطالب بالحرية والعدل والمساواة نفسي أساله بتطبق الكلام علي نفسك سواء في بيتك مع اولادك والدك والدتك وزوجتك أو في الشغل بتصبر وتساعد الناس اللى بتطلب مساعدك وده شغلك اصلا ولا بتاخد رشوة اللى بتسميها هدية او تسهيل للامور أو مع اي حد بيطبق اللى بيطالب به ولا عايزين الكون يمشي في اتجاه واحد هو اللى انتم عايزينه وبس !

تذكروا هذه الآية جيدا (( إن الله لا يُغيرُ ما بقوم حتي يُغيرُوا ما بأنفسهم ))



ليست هناك تعليقات:

إرسال تعليق